Jóhanna Sigurðardóttir:
Herra forseti. Það er vissulega jákvætt í þessu frv. að verið er að afnema þá heimild sem hefur gilt um frestun á skattlagningu á söluhagnaði hjá einstaklingum. En við mótmælum því að á sama tíma er ríkisstjórnin að lækka skatta á söluhagnaði hjá örfáum forríkum einstaklingum sem á síðustu tveimur árum voru 636 og fengu frestað um 20 milljörðum sem þýddi í skattatap fyrir ríki og sveitarfélög allt að 8,5 milljarða. Hjá þessum forríku einstaklingum ætlar ríkisstjórnin að lækka skattana á meðan hún beitir sér fyrir almennri skattahækkun á almenning í landinu. Þessu mótmælum við og líka því sem ríkisstjórnin er að gera með brtt., sem við greiðum atkvæði um hér á eftir, um að framlengja gildistökuna á þessu um eitt ár.