Heilbrigðisráðherra (Jón Kristjánsson):
Herra forseti. Fyrirspurn hv. þm. Þuríðar Backman hljóðar á þessa leið:
,,1. Hefur ráðherra látið kanna hagkvæmni sjúkrahótela
a. fyrir sjúklinga,
b. fyrir heilbrigðisþjónustuna,
c. fyrir ríkissjóð,
d. fyrir Tryggingastofnun ríkisins?``
Svarið við því er að Rauði kross Íslands hefur starfrækt sjúkrahótel frá árinu 1974. Sjúkrahótelið var rekið með óbreyttu sniði frá stofnun þess allt til á sl. ári en þá var þjónustan efld með samningi við Landspítala -- háskólasjúkrahús.
Sjúkrahótelið hefur haft rekstrarheimild fyrir 28 rýmum en greiðslur til sjúkrahótelsins hafa verið í formi daggjalda sem greidd eru af Tryggingastofnun ríkisins. Með samningi við Landspítala -- háskólasjúkrahús fjölgaði rýmum í 40 að meðaltali á ári. Kostir sjúkrahótela eru talsverðir. Á sjúkrahóteli öðlast aldraðir einstaklingar færni eftir aðgerð á sjúkrahúsi áður en þeir geta snúið heim. Sjúklingar af landsbyggðinni, sem eru í hvers konar rannsóknum og eftirliti, eiga þess kost að dvelja á sjúkrahóteli og greiða fyrir það hóflegt gjald í stað þess að dvelja í dýrara húsnæði í höfuðborginni. Aðstandendur eða fylgdarmenn sjúklinga sem þurfa nauðsynlega á aðstoð og stuðningi þeirra að halda eiga þess kost að dvelja á sjúkrahóteli. Sjúkrahótel er þjónustuform sem gefur kost á ódýrari valmöguleikum í heilbrigðisþjónustunni og betri nýtingu fjármagns sem fer til rekstrar bráðasjúkrahúsa.
Í marsmánuði árið 1995 var gerð könnun á vegum landlæknisembættisins í samvinnu við Borgarspítalann, Landspítalann, Landakotsspítala, heilbr.- og trmrn. og fjmrn. til að kanna hvort sjúklingar sem þá lágu á framangreindum sjúkrahúsum gætu mögulega nýtt sér slíkt þjónustuform. Niðurstaða þeirrar könnunar sýndi að um 20% sjúklinga á þeim deildum sem könnunin náði til gætu mögulega nýtt sér vistun á sjúkrahóteli í stað vistunar á sjúkrahúsi.
,,2. Hve mörgum sjúklingum hefur verið vísað frá gistingu á sjúkrahóteli Rauða krossins undanfarin fimm ár, sundurliðað eftir árum?``
Í bókhaldi sjúkrahótels Rauða kross Íslands er ekki til listi yfir þá sem vísað hefur verið frá gistingu sl. fimm ár en samkvæmt upplýsingum frá sjúkrahóteli Rauða kross Íslands var u.þ.b. tíu einstaklingum vísað frá á sl. ári á tímabilinu maí--september þegar eingöngu 28 rými voru til umráða.
,,3. Hver er meðalgistitími sjúklinga á sjúkrahóteli Rauða krossins?``
Samkvæmt upplýsingum sem bárust frá sjúkrahóteli Rauða kross Íslands er meðalgistitími á sjúkrahótelinu u.þ.b. tvær til þrjár vikur að undanskildum nokkrum tilvikum þar sem einstaklingar hafa dvalið allt að 10 mánuði. Nokkrir aldraðir voru lengur en fjórar vikur í bið eftir öldrunarrými og einn einstaklingur dvaldi í 10 mánuði á sjúkrahótelinu í bið eftir rými á stofnun fyrir aldraða. Þrír einstaklingar voru á sjúkrahótelinu á sl. ári í bið eftir félagslegu húsnæði.
,,4. Hyggst ráðherra beita sér fyrir rekstri sjúkrahótela/sjúkraheimila innan heilbrigðisþjónustunnar og, ef svo er, hvenær má búast við að framkvæmdaáætlun verði lögð fram?``
Á árinu 2000 gerðu Landspítali -- háskólasjúkrahús og Rauði kross Íslands samning um aukið samstarf um rekstur sjúkrahótelsins við Rauðarárstíg. Í samstarfinu fólst tímabundin fjölgun gistirýma auk þess sem þjónusta sjúkrahótelsins var styrkt enn frekar. Með samningnum var samstarf göngudeildar og endurhæfingardeildar spítalans við sjúkrahótelið aukið og reglubundnum ferðum var komið á milli sjúkrahótelsins og spítalans.
Sjúkrahótelið er betur í stakk búið til að taka við veikara fólki en áður var. Samningurinn var gerður í tilraunaskyni.
Var það mat samningsaðila að halda bæri áfram á þessari braut. Samningsaðilar ásamt heilbr.- og trmrn. vinna nú að undirbúningi nýs samnings til þriggja ára og ég á von á því að sá samningur verði frágenginn alveg á næstunni.