[prenta uppsett í dálka] 59. fundur, 127. lþ.
Þuríður Backman:
Herra forseti. Mér vitanlega var tíundarsjóðurinn ekki notaður til skemmtanahalds. Aftur á móti var hann þau tíu ár --- en eins og komið hefur fram er hann nú aflagður --- mikilvægur fyrir starfsmenn og heilbrigðisstofnanir sem sérstakur afmarkaður sjóður sem hægt var að vísa í þegar starfsmenn óskuðu eftir að fara á endurmenntunarnámskeið og vegna símenntunar og eins til tækjakaupa og viðhalds. Þetta var afmarkaður tekjustofn sem var þá haldinn í ákveðnum tilgangi.
Ég hefði frekar áhyggjur af því nú, herra forseti, að þegar þessi tíund rennur inn í almennan rekstur, þá verði erfiðara að klípa þá tíund frá til endurmenntunar, símenntunar og viðhalds, tækjakaupa og til stefnumótunar á stofnunum, þar sem erfiðleikar í daglegum rekstri gætu dregið úr framlögum.
