Ásta R. Jóhannesdóttir (andsvar):
Herra forseti. Ég þakka hæstv. ráðherra fyrir svörin við þeim spurningum sem komu fram. Ég heyrði á honum að verið er að vinna í tækjakosti eða reyna að leysa þann vanda sem Tryggingastofnun stendur frammi fyrir hvað varðar tölvumálin. Ég spurði: Gerir hæstv. ráðherra ráð fyrir að búið verði að leysa þau mál þannig að Tryggingastofnun geti farið eftir þessum lögum eins og gert er ráð fyrir í sambandi við vélræna samkeyrslu og allt það sem þessi lög fela í sér, að búið verði að leysa vanda Tryggingastofnunar í tölvumálum áður en lögin koma til framkvæmda þannig að stofnunin fari eftir þeim og geti það?