Tómas Ingi Olrich:
Herra forseti. Við þessa umræðu hefur komið í ljós svo ekki verður um villst að tillöguflutningur Vinstri grænna um þjóðaratkvæði hefur þann tilgang að leggja hindrun í veg fyrir áform ríkisstjórnarinnar um virkjun og atvinnuuppbyggingu á Austurlandi. Valkostir tillögunnar eru vísvitandi hafðir óljósir. En það er ekki meginatriði heldur hitt að tillagan og allur málflutningur Vinstri grænna beinist í raun gegn þeirri pólitísku ákvörðun að ráðast í stóráfanga í atvinnuuppbyggingu, áfanga sem mun valda straumhvörfum í atvinnulífi á Austfjörðum og hafa mikil jákvæð áhrif um allt Norðausturland.
Raunar hefur öll uppbygging orkufreks iðnaðar áhrif á umhverfið. Öll nýting lands undir atvinnustarfsemi, þar með talin ferðaþjónusta, hefur áhrif á umhverfið. Að sjálfsögðu er ekkert því til fyrirstöðu þótt Kárahnjúkavirkjun verði reist að hægt verði nýta þetta víðáttumikla svæði norðan Vatnajökuls fyrir ferðaþjónustuna. Í raun gera engir kröfu, engir ferðamenn gera kröfu um gjörsamlega ósnortin víðerni aðrir en þeir ferðamenn sem ekki eru að sækjast eftir þjónustu. En það eru ekki slíkir ferðamenn sem Íslendingar sækjast eftir heldur hinir sem vilja koma hingað til að kaupa þjónustu.
Stundum gleymist að hér á landi er í gildi hin strangasta löggöf um umhverfismál, ein strangasta löggjöf um mat á umhverfisáhrifum sem til er í Evrópu. Hér eru viðmiðin þrengri. Hér eru allar kröfur sterkari en annars staðar í Evrópu. Í þessu máli hefur verið farið í einu og öllu að lögum og úrskurður umhvrh. var sérdeilis vandaður og málinu til mikils fulltingis. Með tilkomu Kárahnjúkavirkjunar og álvers í Reyðarfirði skapast í raun forsendur fyrir miklum framförum og uppbyggingu á Austurlandi til hagsbóta fyrir landið allt. Við megum ekki gleyma því að Vinstri grænir hafa verið manna ötulastir við að liggja ríkisstjórninni á hálsi fyrir að hún hafi ekki staðið sig í byggðamálum.
Það mál sem hér er verið að tala um, þ.e. bygging Kárahnjúkavirkjunar og álver við Reyðarfjörð, er sambærilegt við það mikla framfaraspor í málum landsbyggðarinnar sem stigið var þegar Háskólinn á Akureyri var stofnaður. Hér er því um að ræða eitt stærsta mál í byggðastefnu á landinu í dag og viðurkennt er að byggðavandinn er eitt af stærri vandamálum Íslendinga.
Tillaga um þjóðaratkvæði um virkjunina er atlaga að þessum áformum. Sú tillaga er fram komin til að leggja hindrun fyrir framgang eins stærsta framfaramáls landsbyggðarinnar og í raun tilraun til þess að sníða athafnafrelsi og atvinnulífi landsbyggðarinnar annan og þrengri stakk en atvinnulífi höfuðborgarsvæðisins. Engin rök mæla með því að svo sé á málum haldið. Öll rök mæla hins vegar með því að greiða götu þessa mikla framfaramáls sem virkjunin er og allt sem á því hangir.