Halldór Blöndal (andsvar):
Herra forseti. Það er rétt hjá hv. þm. að það vantar ekki að Vinstri grænir hafi uppi hugmyndir. Þegar vel stendur á tala þeir gjarnan um rammaáætlanir og heildarsýn og eru með því að reyna að drepa málinu á dreif. En upp úr stendur að þessi þingflokkur hefur ekki lagt neitt það til atvinnumála sem mark er á takandi þegar við erum að tala um málefni dreifbýlis og landsbyggðarinnar. Þeir hafa þvert á móti snúist gegn flestu því sem til framfara hefur horft eða er stórt í sniðum. Menn verða auðvitað að ráða því sjálfir hvort þeir horfa til fjalla eða ekki í þessum skilningi. Því miður gerir Vinstri hreyfingin -- grænt framboð það ekki.