[prenta uppsett í dálka] 74. fundur, 127. lþ.
Ögmundur Jónasson (andsvar):
Herra forseti. Það er alltaf afar fróðlegt að hlusta á hv. þm. Pétur H. Blöndal fræða okkur um efnahagsmálin. Ekki er langt síðan hann lagði til að fækkað yrði á sjúkrahúsunum um helming, held ég að það hafi verið, og vísaði þar í sjúkraliða, hjúkrunarfræðinga og lækna. Nú sér hann það sem alvarlegustu efnahagsmeinsemdina að opinber þjónusta hafi verið bætt á einhverjum sviðum.
En ég vildi beina spurningu til hv. þm. í ljósi þess að hann telur það vera almennt af hinu illa að veita styrki eins og Byggðastofnun byggir á og leggur til að ýmsu leyti: Hvert er þá hans álit á Kárahnjúkavirkjun? Nú hefur fjármálastjóri Landsvirkjunar lýst því yfir að ef hún væri reist á vegum sjálfstæðs fyrirtækis á einkamarkaði, hlutafélags- og einkamarkaði, þá mundi hann ekki geta mælt með þessari ráðstöfun því að hún mundi aldrei bera sig. Ætlar hv. þm. þá (Forseti hringir.) að vera sjálfum sér samkvæmur og greiða atkvæði gegn því að ráðist verði í þessa virkjun með íslensku þjóðina að bakhjarli?
(Forseti (ÍGP): Ég minni hv. þingmenn að virða tímamörk.)
