[prenta uppsett í dálka] 74. fundur, 127. lþ.
Jóhann Ársælsson (andsvar):
Hæstv. forseti. Í sambandi við þessa lánastarfsemi vil ég bara endurtaka að ég tel að menn verði að halda þessum hlutum aðskildum. Hin almenna bankastarfsemi og starfsemi sparisjóðanna hlýtur að þurfa umhverfi þar sem allir standa jafnir. Ef ríkið telur sig hins vegar þurfa að rétta af stöðu landsbyggðarinnar þá finnst mér skást að gera það í gegnum sérstakan sjóð, eins og Byggðastofnun er með. Það verður þá að hafa sinn gang.
En varðandi það sem hv. þm. sagði um ræðu mína, hvað uppbygginguna í Hvalfirði varðar og áhrifin á Vesturland, þá tel ég að í raun sé ekkert um þessa hluti að þræta. Ég held að menn séu allir sammála um áhrifin af þessu. Það sem menn eru kannski ekki sammála um eru hversu mikil áhrifin eru af mengun og hvernig við eigum að taka á þeim málum í framtíðinni. Ég held að það sé út af fyrir sig nokkuð sem menn þurfi að ræða miklu betur. Mér finnst að það vanti verulega upp á að menn sjái hvaða ráðum eigi að beita til að hafa áhrif á mengunina. Það verður að vera hægt að nota hagræna hvata til þess. Það verður að vera á ábyrgð þeirra sem reka framleiðsluna að borga fyrir mengunina. Þannig þurfa menn að taka á þessum málum í framtíðinni.
