Árni Steinar Jóhannsson (andsvar):
Herra forseti. Ég skil ekki alveg af hverju hv. þm. Össur Skarphéðinsson fyrtist við vegna þess að ég tæpti aðeins á því sem kom fram í ræðu hans. Hann lýsti því að skoðanir væru skiptar og sumir væru með og sumir á móti. Þess vegna er ekki óeðlilegt að kallað sé eftir áliti formannsins á því hvernig landið liggi í þessum málum.
Varðandi reykspúandi málmbræðslur hefur afstaða mín til stóriðjumálmbræðslna í stórum stíl alltaf legið ljós fyrir. Í 20 ára pólitísku starfi mínu norður í Eyjafirði hef ég ævinlega verið andvígur uppbyggingu á stórri málmbræðslu eins og þar var um rætt. Það er ekki ný bóla.