[prenta uppsett í dálka] 78. fundur, 127. lþ.
Drífa Hjartardóttir (andsvar):
Herra forseti. Ég held að í mínu máli hafi komið skýrt fram að ég tel að við eigum að nýta vatnsöflin til góðra hluta og ég tel að við séum að gera það í þessu. Óásættanleg náttúruspjöll eru víðtæk orð með óræða merkingu. Þau geta verið ásættanleg hjá einum og óásættanleg hjá öðrum. Sumum getur þótt óásættanlegt að byggja út í Tjörnina í Reykjavík en öðrum ásættanlegt.
Mér hefur oft þótt sem allt verði vitlaust ef fara á að framkvæma eitthvað úti á landi en enginn segir orð ef verið er að framkvæma það hér. Hér er verið að fylla upp land hringinn í kringum Reykjavíkurborg, það er verið að stækka Seltjarnarnesið með uppfyllingum. Það segir enginn eitt einasta orð, það þarf aldrei að fara í umhverfismat. Ef það á að gera eitthvað, jafnvel að færa einhvern lítinn vegspotta úti á landi, verður nánast allt vitlaust og það þarf að fara í umhverfismat.
