Fjármálaráðherra (Geir H. Haarde) (andsvar):
Herra forseti. Ég veit ekki hvort opinberir starfsmenn eru jafnilla að sér um þessi mál og hv. þm. gefur í skyn, eða menn almennt. En það er sjálfsagt að stuðla að aukinni upplýsingagjöf um þessi verðmætu réttindi sem fólk á, bæði í Lífeyrissjóði starfsmanna ríkisins og annars staðar. Það er líka sjálfsagt að ýta undir að fólk taki þau með í reikninginn þegar það er að reikna út heildarstöðu sína lagalega séð. Ég tek alveg undir það með þingmanninum.