[prenta uppsett í dálka] 82. fundur, 127. lþ.
Jón Bjarnason (andsvar):
Herra forseti. Hér er afar sérkennileg staða uppi. Hæstv. iðnrh. verður að vísa í stjórnarsáttmálann þegar hún er að bera af sér orð hv. þm. Sjálfstfl., Kristjáns Pálssonar, sem er með í ríkisstjórn. Þetta er alveg furðulegt og afar sérstakt. Eigum við von á því, virðulegur forseti, að við fáum kannski að sjá hérna nokkrar byggðaáætlanir? Framsfl. komi með eina byggðaáætlun, kannski klofna? Sjálfstfl. komi með aðra byggðaáætlun, kannski klofna. (Gripið fram í: Og sveitarstjórnarmenn á Vestfjörðum.) Sveitarstjórnarmenn á Vestfjörðum, Vestfirðingar sem telja sig vera algjörlega gleymda í byggðaáætlun hæstv. iðnrh. eru að vinna að sinni byggðaáætlun. Ég á von á því að Norðurland vestra og Snæfellsnes telji sig vera hlunnfarna í þessari byggðaáætlun. Hvað er eiginlega að gerast? Munum við fá sérstaka byggðaáætlun frá stjórnarandstöðunni í Sjálfstfl.?
