[prenta uppsett í dálka] 82. fundur, 127. lþ.
Einar Oddur Kristjánsson (andsvar):
Herra forseti. Það getur nú verið ýmislegt ef til á að taka. Ég sé á þessari þáltill. frá ríkisstjórninni að þar er gert ráð fyrir nýjum sjóði til þess að efla nýjan iðnað á landsbyggðinni. Ríkisstjórnin treystir sér ekki til þess að láta þennan sjóð inn í Byggðasjóð, eins og væri náttúrlega eðlilegast af öllu að setja hann þar sem hann er á Sauðárkróki. Ég hef það til marks. Ríkisstjórnin sjálf virðist ekki treysta Byggðastofnun.
Það þarf því ekki langt að leita fanganna til að benda á að það eru ýmsir fleiri en ég sem efast um framkvæmd mála þar. Við höfum alveg orðið vör við það hvernig stjórnsýslan hefur gengið þar. Haldinn var fundur í stjórn Byggðasjóðs held ég á fimmtudag eða föstudag, þá hafði ekki verið haldinn fundur síðan á jólaföstu. Þetta tel ég ákaflega óeðlilegt og þegar ég spyr hvað sé að þarna þá fæ ég mjög lítil svör.
En ég hef orð á þessu vegna þess að mér svíður undan því. Hér er um mjög þýðingarmikið atriði að ræða í byggð á Íslandi öllu sem stendur höllum fæti.
