Kristinn H. Gunnarsson (andsvar):
Herra forseti. Ég er út af fyrir sig sammála því að fleiri tillögur þarf í skjalið. Það er of mikið um athuganir á hlutum sem búið er að athuga býsna mikið og menn vita nokkuð mikið um. Ég gæti rakið í löngu máli þær tillögur sem liggja fyrir frá aðilum eins og þingnefnd sem starfaði á vegum forsrn. og skilaði af sér í mars 1999, frá Byggðastofnun og fleiri aðilum. Við erum búin að gera tvær byggðaáætlanir áður, 1994 og svo 1999. Í t.d. einni skýrslunni voru margar beinar aðgerðatillögur sem sumar hverjar hafa náð fram að ganga.
Ég tel að styrkja þurfi það skjal sem hér liggur fyrir í þá veru að það séu beinar og ákveðnar tillögur sem lúta að atvinnuuppbyggingu og jöfnun lífskjara.