Guðjón A. Kristjánsson (andsvar):
Herra forseti. Ég veit ekki hvað hæstv. ráðherra byggðamála átti við þegar hún viðhafði þau orð að þingmenn Vestfjarða væru hér í einhverri samkeppni um að setja fram athugasemdir eða aðrar skoðanir en birtast í plagginu um stefnu í byggðamálum.
Ég ætla a.m.k. að lýsa því yfir fyrir mína parta að ég hef svipaðar skoðanir á þessum byggðamálum og ég hef haft í nokkur ár, að byggðastefnan væri ágætisyfirlýsing en það vantaði alltaf í hana eftirfylgnina og væri búið að vanta lengi. Ég hef gert grein fyrir því í ræðum mínum í dag að megnið af því sem stendur í þessu plaggi stóð líka í plaggi sem fæddist 1991 og í mörgum plöggum sem hafa síðar komið varðandi stefnu í byggðamálum. En iðulega hefur eftirfylgnina vantað og síðan er það auðvitað það að stefna ríkisstjórnarinnar í sjávarútvegsmálum hefur grafið undan byggðunum.