Fyrirspyrjandi (Lúðvík Bergvinsson):
Virðulegi forseti. Það þarf svo sem ekkert að hafa um það mörg orð að innkaup ríkisins á því sem það þarf að kaupa eru mikil og miklu máli skiptir að vel sé með farið í þeim efnum. Hlutur Ríkisspítalanna er ekki lítill í þessum efnum.
Eins og lögum er nú háttað er skylt að bjóða út öll innkaup nema þau séu undir 5 millj. og kaup á þjónustu og verkum yfir 10 millj. skal bjóða sérstaklega út. Það eru því ákveðnar reglur um hvað skuli bjóða út þótt það í sjálfu sér takmarki ekki á neinn hátt að önnur innkaup séu einnig boðin út.
Ég hef því leyft mér að beina fyrirspurn til hæstv. fjmrh. þar sem ég spyr:
Hversu hátt hlutfall, tiltekið í prósentum eða krónum af heildarfjárhæð, af innkaupum Ríkisspítalanna er samkvæmt útboði?