[prenta uppsett í dálka] 85. fundur, 127. lþ.
Utanríkisráðherra (Halldór Ásgrímsson) (andsvar):
Herra forseti. Það gefst tækifæri til þess að ræða um málefni Palestínu á ýmsum fundum. Til dæmis er fundur Eystrasaltsráðsins í Kaliningrad í næstu viku. Þar mun ég hitta ýmsa ráðherra og mun m.a. eiga sérstakan fund með utanríkisráðherra Rússlands. Þetta mál mun koma þar á dagskrá. Mjög margir ráðherrar hér á landi verða í tengslum við fund Atlantshafsbandalagsins í vor. Ljóst er að þessi mál verða þar á dagskrá með tvíhliða hætti milli margra ríkja og það liggur alveg ljóst fyrir að á þeim fundi munu Íslendingar eiga tvíhliða viðræður við mjög margar þjóðir, m.a. Bandaríkjamenn. En ég held að hv. þingmenn vanmeti það að mjög lítið sé fylgst með umræðum hér á landi. Hér eru mörg sendiráð. Þau taka vel eftir því hvað Íslendingar segja í þessu máli. Og því er komið skilmerkilega á framfæri við viðkomandi þjóðir.
Það er líka alveg ljóst að Ísraelsmenn fylgjast með þeirri umræðu sem á sér stað hér á landi. Ég held því að hv. þingmenn þurfi ekkert að óttast um það að bæði sjónarmið þeirra og íslenskra stjórnvalda komast fyllilega til skila.
