Árni Steinar Jóhannsson (andsvar):
Virðulegi forseti. Ég hlustaði á ræðu þingflokksformanns míns í gær með mikilli athygli og þar kom fram hjá honum að þegar farin er þessi svokallaða fyrningarleið, enda er það svo í tillögum okkar, að við erum með þríliðun á því hvernig útdeiling aflaheimilda fer fram á grunni fyrningarinnar. Það er alveg augljóst og það kom fram hjá hv. þm. Ögmundi Jónassyni að það skapar gjaldtöku í sjálfu sér, vegna þess að einn þriðji af þeim aflaheimildum sem eru fyrndar samkvæmt þeim hugmyndum fer á markað, og einn þriðji af aflaheimildunum er byggðatengdur sveitarfélögunum og þeim er í sjálfsvald sett og þau geta ákveðið að setja hann á markað eða endurúthlutað til fyrirtækjanna, það er þeim í lófa lagið. Það er því alveg rétt að við tölum fyrir gjaldtöku sem myndast í krafti þess að verið er að bjóða upp á nýtt fyrndar aflaheimildir og síðan mundu e.t.v. sum sveitarfélögin ákveða að innheimta einhvers konar gjald eða fara uppboðsleið.