Karl V. Matthíasson (andsvar):
Herra forseti. Ég þakka hæstv. ráðherra fyrir að hafa tekið vel í þær spurningar og vangaveltur sem ég lagði fram áðan í umræðunni og gleðst ég yfir jákvæðu viðhorfi hans til þorskeldis sem ég reynar vissi að hann hafði. Ég sé hér ákveðna möguleika opnast fyrir þá sem eru í þeirri grein og tel að það muni efla og styrkja byggðir landsins og jafnvel verða til þess að rétta hlut okkar nokkuð í sjávarútveginum.
Eins og hæstv. ráðherra sagði áðan er byggðakvótinn nú kominn upp í 5.300 tonn. Upphaflega var hann 1.500. Í raun er þetta nokkuð skuggalegt í mínum huga og þær spurningar vakna hvort ráðherra hafi ekki áhyggjur af því að hér er um 180% aukningu að ræða. Ef svo heldur fram sem horfir þá gæti þessi byggðakvóti verið orðinn 10--15 þús. tonn eftir fjögur, fimm ár. Ég vil hvetja til þess að menn skoði hvaða afleiðingar þessi lagasetning getur haft ef af verður.