Kristján L. Möller (andsvar):
Herra forseti. Varðandi það frv. til laga sem hæstv. samgrh. hefur hér fylgt úr hlaði og lagt var fram á síðasta þingi vil ég minna á að hluti af því, sem reyndar er svo settur fram í þessu frv., var kallaður til baka. Þá fengum við sem sitjum í samgn. bréf frá hæstv. samgrh. þar sem sagði m.a., með leyfi forseta, varðandi það að ákveðið var að draga þann hluta sem hér er út úr frv.:
,,Ástæðan er m.a. sú að ákvæði frv. tengjast að nokkru leyti kjaradeilu sjómanna á fiskiskipum. Í ráðuneytinu hafa verið óformlegir fundir með þeim aðilum sem að málinu koma en ekki hefur fundist viðunandi lausn.``
Þess vegna vil ég leyfa mér, herra forseti, að spyrja hæstv. samgrh. sem flytur þetta frv., sem m.a. að hluta fjallar um fækkun stýrimanna í ákveðnum útgerðarflokkum og vélstjóra líka, hvort þessi viðunandi lausn sem getið er um í bréfinu frá 26. apríl í fyrra, hafi fengist og hvort viðkomandi stéttarfélög sjómanna séu orðin sátt við frv. eins og það liggur hér fyrir.