Gísli S. Einarsson:
Virðulegur forseti. Það er ástæða til að þakka hv. þm. Ögmundi Jónassyni þessa fsp. Ég hef margsinnis rætt skýrslur Ríkisendurskoðunar á Alþingi, ekki bara þá skýrslu sem hér er sérstaklega verið að spyrja um heldur almennt.
Um ábendingar stofnunarinnar varðandi eitt og annað sem betur má fara almennt er þetta að segja: Ég tel að margar athugasemdir í skýrslum Ríkisendurskoðunar séu þannig vaxnar að þær knýi beinlínis á um eftirfylgni Alþingis og ráðuneyta sem í hlut eiga hverju sinni. Því hvet ég, og skora í rauninni á hæstv. forsrh., að beita sér fyrir því sem fyrsta skrefi, í samráði við forseta Alþingis, að fela á beinan hátt með fyrirskrifuðum verklagsreglum viðkomandi starfsnefndum þingsins í hverju tilviki að álykta og fylgja eftir þeim leiðréttingum sem þörf er á.
Vel að merkja, oftast er eftirfylgninnar þörf, virðulegur forseti.