Menntamálaráðherra (Tómas Ingi Olrich):
Herra forseti. Mér finnst ástæða til að vekja athygli á því að þessi umræða um nefndir hefur verið mjög yfirveguð. Það er að sjálfsögðu vegna þess að í þessum sal virðast menn gera sér vel grein fyrir því að nefndir eru eitt af verkfærum lýðræðisins til að breikka umræðuna, leiða fagleg sjónarmið inn í hana og gefa kost á því að umfjöllunin verði sem best á faglegan máta. Það verður að viðurkenna að það er oft dýrt en lýðræðið er ekki alltaf ódýrt.
Í mjög mörgum tilfellum, t.d. innan menntmrn., er um að ræða skólanefndir, prófanefndir og úthlutunarnefndir. Um slíkar nefndir er mælt fyrir í lögum.