Samgönguráðherra (Sturla Böðvarsson):
Herra forseti. Ég vil taka fram, þannig að ekkert fari þá milli mála, að sú vegáætlun sem er í gildi núna og nær til ársins 2004 gerir ekki ráð fyrir framkvæmdum við jarðgöng undir Almannaskarð. Til þess að það fari ekkert á milli mála vil ég taka fram að ég tel engar líkur á því að við endurskoðun á núgildandi vegáætlun komi inn fjárveiting til að hefja framkvæmdir við umrædd jarðgöng.
Óteljandi mörg önnur verkefni bíða úrlausnar á sviði vegamála og því er ekki skynsamlegt að vekja neinar vonir um að þau göng komi inn og fram fyrir mörg önnur verkefni sem hafa verið og eru á vegáætlunni. Þetta vildi ég að kæmi fram við þessa umræðu.