[prenta uppsett í dálka] 97. fundur, 127. lþ.
Fyrirspyrjandi (Margrét Frímannsdóttir):
Virðulegi forseti. Ég þakka hæstv. ráðherra svörin og það að þegar séu hafnar viðræður við Framhaldsskólann í Vestmannaeyjum um að taka þetta verkefni að sér því að það er mjög mikilvægt fyrir þetta bæjarfélag sem hefur átt undir högg að sækja að efla möguleika heimafólks á því að stunda fjarnám.
Fyrr í dag, virðulegi forseti, var heilmikil umræða um fjarvinnslu. Í mínum huga er fjarnámið einhver mikilvægasta fjarvinnslan sem stunduð er á landinu. Það hefur sannarlega verið aukið á undanförnum árum en við getum gert enn betur. Ég held að í raun og veru séu möguleikarnir til þess að stunda fjarnám sú fjárfesting sem á eftir að skila landsbyggðinni mestu á komandi árum. Þess vegna fagna ég því alveg sérstaklega að hæstv. menntmrh. skuli hafa beitt sér í þessu nú þegar, og ég veit af samræðum sem ég hef átt við hann í gegnum tíðina að hann er mikill áhugamaður um að fjarnám verði eflt.
