Arnbjörg Sveinsdóttir (andsvar):
Hæstv. forseti. Í svari hv. þm. kom ekki fram afstaða hans til ferðamála og hvort það er skoðun hans að við sem styðjum virkjun séum á móti ferðaþjónustu. Þau sjónarmið koma ítrekað fram hjá vinstri grænum að ekki sé hægt að stunda þessar atvinnugreinar saman.
Auðlindir okkar Austfirðinga liggja í því að við eigum óvirkjuð jökulvötn, mikið af víðernum og mörg tækifæri í ferðaþjónustu. Og auðvitað viljum við nýta þessi tækifæri. Við Austfirðingar erum mjög áfram um það og margir hafa lagt mikið á sig til þess að geta stundað ferðaþjónustu.
En það er jafnljóst að erfiðleikar í ferðaþjónustu verða áfram ef ekki er hægt að lengja ferðamannatímabilið. Og það er líka jafnljóst að það umfang á þeim framkvæmdum sem fyrirhugaðar eru varðandi virkjunina og byggingu álvers í Reyðarfirði mun auðvitað styrkja ferðaþjónustuna mjög verulega því að fjöldi fólks verður á ferðinni á Austurlandi utan hins venjulega ferðamannatíma og mun þurfa að nýta þær stofnframkvæmdir og þá grunnþjónustu sem til er í ferðaþjónustunni. Og við hljótum að geta fagnað því saman, ég og hv. þm., að þessar framkvæmdir verði þannig til þess að styrkja ferðaþjónustuna ef menn ætla yfir höfuð að lifa af henni.