[prenta uppsett í dálka] 102. fundur, 127. lþ.
Arnbjörg Sveinsdóttir (andsvar):
Hæstv. forseti. Ég verð að lýsa undrun minni á aðkomu hv. þm. Þuríðar Backman að þessu máli og hvernig hún notaði viðtekna frasa í ræðu sinni þótt hún vissi betur. Í rauninni fór hún yfir það í ræðu sinni eins og þegar hún sagði að ekki væri verið að gera neitt annað á Austurlandi en að bíða eftir álveri. Ég fullyrði að þingmaðurinn veit betur. Ég spyr hana þess vegna:
Veit hv. þm. ekki af því að fé hefur verið sett til þess að LTU geti flogið á Egilsstaði til að efla ferðaþjónustu?
Veit hv. þm. ekki af því að verið er að vinna að hafnarframkvæmdum til að hægt sé að taka á móti stærri og öflugri Norrænu?
Veit hv. þm. ekki af því að mjög öflugt skógræktarátak hefur verið í gangi hjá bændum á Austurlandi og að það er enn að vaxa og stækka?
Ætli þingmaðurinn viti ekki af því að í gangi er öflugt átak núna varðandi laxeldi og fiskeldi ýmiss konar?
Hefur ekki verið átak í gangi varðandi menntamál eins og háskólamenntun?
Og hafa Austfirðingar ekki gengið fram í því að vera með mikla frumkvöðlastarfsemi varðandi menningarmál og gert samning þar að lútandi sín á milli?
