Jón Bjarnason (andsvar):
Herra forseti. Ég þakka hv. þm. Guðmundi Hallvarðssyni fyrir að benda ítrekað á mikilvæga þætti í samgöngumálum og einmitt varðandi öryggismálin. Það er í sjálfu sér erfitt að gera upp á milli þeirra atriða sem hv. þm. var að nefna. Það sem ég var að leita eftir var hvort fyrirhugað væri að beita þessum niðurskurði á þær tiltölulega lágu upphæðir sem veittar eru til slíkra öryggismála, m.a. að girða af og verja veginn búfé og fækka einbreiðum brúm.
Ég minni á ágæta umræðu sem fram fór í gær um umferðaröryggismál þar sem lagt hefur verið fram metnaðarfullt frv. frá hæstv. dómsmrh. um að draga úr slysum í umferð á næstu árum. Það er metnaðarfullt frv. en með því verður ekki náð árangri nema umferðaröryggismálum verði forgangsraðað.
Ég vil spyrja hv. þm. á móti, sem ég geri ráð fyrir að hafi fylgst með umræðunni um umferðaröryggismálin í gær, hvort honum finnist þar einmitt ekki mikilvægt atriði í samgöngumálum sem ástæða væri til veita hærri sess við ráðstöfun á fjármagninu og verja ætti slíka þætti niðurskurði.