Samgönguráðherra (Sturla Böðvarsson) (andsvar):
Herra forseti. Það hefur margt borið á góma þegar við hv. þm. Björn Bjarnason höfum talað saman, þannig að af ýmsu er að taka þegar litið er til verkefna á höfuðborgarsvæðinu sem þarf að vinna á næsta kjörtímabili, svo maður fari nú aðeins í umræðuna um sveitarstjórnarmál.
En hins vegar þarf ekki að koma hv. þm. á óvart þó ekki liggi fyrir hvort næturflugsaðstaða verði á Þingeyrarflugvölli vegna þess að allt fram á síðustu mánuði hefur öll áhersla verið lögð á að reyna að koma upp og rannsaka hvort næturflugsaðstaða geti verið á Ísafjarðarflugvelli. Ef það hefði orðið niðurstaðan, þá hefði það verið besti kosturinn. Nú liggur fyrir að engar eða mjög litlar líkur eru á að það geti orðið og þá snúum við okkur að næsta verkefni sem er að rannsaka hvernig við búum Þingeyrarflugvöll þannig að hann geti sinnt því hlutverki sem flugvellirnir á Ísafjarðar- og Vestfjarðasvæðinu þurfa.
Það er því allt eðlilegt hvað varðar þennan undirbúning eins og ég hef margítrekað.