[prenta uppsett í dálka] 115. fundur, 127. lþ.
Utanríkisráðherra (Halldór Ásgrímsson) (andsvar):
Herra forseti. Við erum að undirbúa vetnisvæðingu og það er unnið að því máli af mikilli elju og mikilli alvöru. Það er eitt af því sem getur skipt miklu máli fyrir framtíðina en það tekur hins vegar alllangan tíma.
Ég er ekki sammála því sem hv. þm. segir um að við bregðumst ekkert við heima fyrir. Við erum að sjálfsögðu að bregðast við heima fyrir með því að nýta okkar hreinu og endurnýjanlegu orku. Það eru viðbrögð af okkar hálfu þannig að við föllum algjörlega inn í þá hugsun sem á sér stað á alþjóðavettvangi. Það er að sjálfsögðu þess vegna sem við höfum fengið stuðning við málstað okkar. Heldur hv. þm. e.t.v. að við hefðum fengið þennan stuðning nema vegna þess að viðkomandi lönd höfðu sannfæringu fyrir því að rétt væri að taka tillit til okkar sérstöku aðstæðna og litla hagkerfis? Ég er alveg ósammála því að við séum ekki að bregðast við heima fyrir.
Það þýðir hins vegar ekki að við þurfum ekki að bregðast við í öðrum atvinnugreinum og öðrum þáttum þessa máls eins og í fiskveiðum, samgöngum og öðru sem að þessu lýtur. Þar verðum við að sjálfsögðu að taka á líka og getum ekki undanskilið okkur ábyrgð á þeim sviðum. Mér dettur það ekki í hug. Og að því er verið að vinna.
