[prenta uppsett í dálka] 119. fundur, 127. lþ.
Guðmundur Árni Stefánsson:
Herra forseti. Ég þakka hæstv. utanrrh. hreinskilin svör og ég lýsi því yfir að ég deili skoðunum hans. Mér finnst það í hæsta máta mjög hættuleg braut sem fetuð er ef forsetaembættið ætlar nú í fyrsta skipti og þá væntanlega í framtíðinni að blanda sér í pólitísk viðkvæm deilumál. (SJS: Eru Evrópumálin kannski á dagskrá?) Það gengur auðvitað ekki, herra forseti, að líta þannig til að af því að Norðurlandaráð hafi verið að funda hér þá hafi það verið í lagi. Af því að forseti Íslands hafi í þeim tilfellum talað sem fræðimaður þá hafi það verið í lagi. Og eins og hv. þingmenn, fulltrúar Sjálfstfl. og Vinstri grænna hafa farið fram og af því að skoðanir forseta Íslands féllu í þessu tilfelli að viðhorfum þessara flokka í þessu tiltekna máli þá sé það í lagi. Um það er ekki verið að fjalla hér, herra forseti. Hér er verið að fjalla um það með hvaða hætti forseti Íslands kemur að umræðum í samfélaginu.
Það urðu miklar deilur um það á sinni tíð þegar forseti Íslands gagnrýndi lélega vegi í Barðastrandarsýslu, það voru engar deilur um að vegirnir væru vondir, en mörgum þótti samt forseti Íslands hafa gengið býsna langt þá. Hafi hann gengið langt í gagnrýni sinni þá, þá spyr ég: Hversu langt gekk hann nú? Svari hver fyrir sig.
