[prenta uppsett í dálka] 123. fundur, 127. lþ.
Frsm. utanrmn. (Sigríður A. Þórðardóttir) (andsvar):
Herra forseti. Ég hélt því ekki fram að við gætum sagt að við hefðum þegar uppfyllt samþykktina. Auðvitað höfum við ekki gert það þegar frv. liggur fyrir í þinginu sem lýtur að því að breyta lögum í kjölfarið á þessari samþykkt.
Ég held hins vegar að það að við bregðumst fljótt við, fullgildum samþykktina og breytum síðan lögum í kjölfarið á því eða samtímis muni hvetja aðrar þjóðir til að gera slíkt hið sama. Eins og ég sagði áðan eru þetta lágmarksákvæði. Við Íslendingar stöndum mjög framarlega í þessum efnum. Það er litið til okkar og við höfum verið öðrum gott fordæmi. Ég veit að þessi mál eru í umfjöllun í samgn. og vænti þess að menn skoði þau mjög vel.
