Össur Skarphéðinsson:
Herra forseti. Ég þakka hæstv. forsrh. fyrir skýr svör. Ég skil svör hans þannig að þegar þessi átök verða um garð gengin muni íslensk stjórnvöld aðstoða við uppbyggingu í Afganistan einhvern veginn frekar en nú þegar hefur verið samþykkt.
Mig langar jafnframt að varpa annarri fyrirspurn til hæstv. forsrh. Fram hefur komið að Íslendingar hafa ásamt öðrum bandalagsþjóðum í Atlantshafsbandalaginu tekið þátt í þeirri ákvörðun að bregðast sameiginlega við þessum hryðjuverkum með sérstakri samþykkt sem gerð var í Atlantshafsráðinu. Nú vildi ég spyrja hæstv. forsrh. hvort þær aðgerðir sem hófust í nótt hafi verið bornar undir ráðið og bornar sérstaklega undir íslensku ríkisstjórnina og jafnframt hvort hann viti til þess að fyrirhugað sé að ráðast í frekari aðgerðir og hvort einhverjar slíkar hafi verið bornar undir íslensk stjórnvöld.