Ólafur Örn Haraldsson (andsvar):
Virðulegi forseti. Ef spurningin er um hvort ég vilji haga skattkerfinu þannig að fyrirtæki og einstaklingar úti á landsbyggðinni búi við annað skattkerfi en þeir sem á höfuðborgarsvæðinu búa, þá er svar mitt alfarið: Nei.
Þessar hugmyndir hafa skotið upp kollinum í mörgum flokkum, jafnvel öllum flokkum. En þetta væri að mínu mati mjög óheppileg aðgerð. Hvar ætlum við að draga mörkin um landsbyggð? Telst Eyjafjarðarsvæðið, vaxtarsvæði sem við getum svo sannarlega fundið út um allt land, vera landsbyggð? Eiga þeir að búa við annað skattkerfi en þeir í Þingeyjarsýslunni? Hvar ætlum við að draga mörkin? Við Elliðaárnar, um Hellisheiðina? Ætlum við austur á Hvolsvöll eða upp í Borgarfjörð?
Ég held að við verðum að halda okkur við það skattkerfi sem við höfum. Ef við viljum styrkja landsbyggðina, þá segi ég --- líkt og um annan stuðning í þjóðfélaginu --- að hvort sem við viljum styðja bændur eða einstök byggðarlög, sem ég svo sannarlega styð, byggðastefnu með árangursríkum hætti, þá eigum við að gera það með öðrum hætti en að fara út í það óráð að rugla skattkerfið og reyna að draga einhverjar línur um byggðir landsins þar sem menn njóti mismunandi skatta. Allt mun það leiða til glundroða.