[prenta uppsett í dálka] 8. fundur, 127. lþ.
Iðnaðarráðherra (Valgerður Sverrisdóttir):
Hæstv. forseti. Ég er ekki sammála hv. þm. um að búið sé að loka þessu máli vegna þess að ferlinu er ekki lokið. Lögin eru einu sinni þannig að umhvrh. hefur síðasta orðið og meðan umhvrh. hefur ekki kveðið upp úrskurð sinn er þessu máli ekki lokið og því hefur ekki verið lokað.
Eins og allir vita munu umhvrh. berast frekari gögn í málinu. Hún hefur leitað eftir frekari gögnum, m.a. frá Landsvirkjun, áður en hún kveður upp sinn úrskurð. Málið sem hér er til umfjöllunar hefur því aðgang að þessu ferli þó svo langt sé um liðið. Hins vegar er það rétt hjá hv. þm. að þetta er búið að taka dálítið langan tíma og hefði verið æskilegt að það hefði tekið styttri tíma, en að einhverju leyti er þarna um frumkvöðlastarf að ræða, að mínu mati, þar sem þetta er nokkuð sem við höfum ekki gert áður og þess vegna hefur það sennilega tekið þetta langan tíma. Ég get verið spennt eins og hv. þm. að vita hvað kemur út úr þessu og nú held ég að það séu mjög fáir dagar þangað til niðurstaða verður birt opinberlega.
