[prenta uppsett í dálka] 9. fundur, 127. lþ.
Ísólfur Gylfi Pálmason:
Herra forseti. Ég vil þakka hv. 13. þm. Reykv. Ögmundi Jónassyni fyrir að vekja máls á þessari mjög alvarlegu kjaradeilu sem staðið hefur allt of lengi eða í eitt ár eins og komið hefur fram hér í umræðunni.
Sjúkraliðar eru mjög mikilvæg starfsstétt eins og reyndar aðrar stéttir innan heilbrigðiskerfisins. Það sem er mjög alvarlegt í kjaradeilu eins og þessari er að hún bitnar í raun og veru á röngum aðilum, þ.e. á aðilum sem síst skyldi, sjúklingum. Það er mjög alvarlegt mál.
Umönnunarstörf í landinu eru of illa launuð og það er vissulega áhyggjuefni. En við megum ekki gleyma því að kjaradeila eins og þessi leysist ekki hér í þingsal. Langt í frá. Þess vegna hvet ég samningsaðila til þess að slíðra sverðin og leysa kjaradeiluna sem allra fyrst. Og ég veit að það er vilji til þess bæði í ríkisstjórninni og hjá sjúkraliðum.
