Rannveig Guðmundsdóttir (andsvar):
Herra forseti. Það kemur mér mjög á óvart að ráðherrann skuli falla í þá gryfju að koma með slíkan samanburð. Við erum stöðugt að tala um möguleikann til sjósóknar. Þegar búið er að færa aflaheimildirnar á svo fáar hendur eru það þær hendur sem ráða hvar er veitt og hvar lagt upp. Ég er að lýsa muninum á fjórða áratugnum á Ísafirði og í dag. Það er grundvallarmunur og þetta eru grundvallaratriði.
Herra forseti. Auðlindanefndin náði mikilli sátt og maður lítur með aðdáun á það nefndarstarf. Það sama verður ekki sagt um seinni nefndina sem endaði í bullandi ósátt. Hér hefur komið fram að útgerðin hefur ekki verið að borga nema eiginlega þróunarsjóðsgjaldið og ég spyr, enn á ný, af því að þessu skrefi var hælt sem landsfundurinn er að taka: Hvaða skref verður það? Hverju má búast við af þessu veiðigjaldi?