Halldór Blöndal (andsvar):
Herra forseti. Sú spurning sem hv. þm. hlýtur að svara og verður að svara er þessi: Hvað er á bak við þá fullyrðingu hans að sameign þjóðarinnar hafi verið afhent, með leyfi hæstv. forseta: ,,tilteknum aðilum án endurgjalds``? Hvaða aðilar fengu aukin réttindi með kvótakerfinu? Hverjir voru það? Var það Haraldur Böðvarsson? Er það eitt af þessum fyrirtækjum sem hv. þm. hefur sérstaklega í huga að hafi fengið án endurgjalds rétt til veiða á Íslandi? Ég hélt að það fyrirtæki hefði verið um áratugi í sjávarútvegi. Ég man ekki betur en að Haraldur Böðvarsson hafi byrjað þilskipaútgerð fyrir 1900 og meðal annars í Njarðvíkum eða Keflavík. Ekki man ég betur. Fékk þetta gróna fyrirtæki eitthvað án endurgjalds?
Hv. þm. er að þjónusta smábáta á Akranesi og Snæfellsnesi. Var smábátakörlunum sem ég get suma nafngreint afhentur einhver réttur án endurgjalds á því herrans ári 1984? Var það? Eða höfðu þessir menn verið sjómenn og höfðu þessir menn byggt upp sín fyrirtæki? Og á næstu árum á eftir voru þeir sviptir rétti til að veiða í sama mæli og áður. Er það að afhenda þeim án endurgjalds einhver sérréttindi?