[prenta uppsett í dálka] 13. fundur, 127. lþ.
Drífa Hjartardóttir:
Herra forseti. Ég vil þakka hv. þm. Rannveigu Guðmundsdóttur fyrir að vekja máls á þessu. Lausaganga búfjár á vegum er mjög víðtækt vandamál og hefur haft í för með sér allt of mörg slys og hættur á slysum. Hún ógnar öryggi vegfarenda fyrir utan allan þann kostnað sem hlýst af slysum á fólki og skemmdum á farartækjum. Eins og fram kom hjá hæstv. ráðherra þarf að líta á þetta frá mörgum hliðum. Eitt er þó víst að reglur þurfa að vera samræmdar í þessum málum. Það gengur ekki að banna lausagöngu búfjár í einu sveitarfélagi en að í því næsta gildi ekki sömu reglur. Við eigum að gera allt sem við getum til að draga úr slysahættu því það gengur ekki lengur að hafa þetta í því horfi sem þetta er í dag. Og ef reistar eru girðingar þá verður að sjálfsögðu að halda þeim við. En það gengur ekki að það lendi á bóndanum ef Vegagerðin heldur ekki við þeim girðingum sem henni ber að halda við.
