Ásta R. Jóhannesdóttir (andsvar):
Herra forseti. Ég þakka fyrir þessar upplýsingar sem komu hér fram. Ég tel þær vera mjög mikilvægar og sýna fram á að það er ekki tímabært hjá Ríkisútvarpinu að leggja niður þessar sendingar á stuttbylgju. Það er ljóst á andsvarinu hér frá hv. þm. að sjómenn eru ekki í stakk búnir til þess að nýta sér tölvuþjónustuna á öllum stöðum. Þess vegna get ég tekið undir þá gagnrýni sem kom fram í ræðu hans hér áðan að það er lítill ávinningur í þeim sparnaði, ef um sparnaðartillögu er að ræða, að hætta þessum stuttbylgjusendingum. En sjálfsagt munu þær falla niður í framtíðinni eftir því sem tækninni fleygir fram.