Árni Steinar Jóhannsson:
Virðulegi forseti. Ég þakka hv. þm. Katrínu Fjeldsted fyrir þessa fyrirspurn.
Mig grunar reyndar að okkar menn í orkugeiranum fylgist mjög náið með þessum málum og framþróun varðandi möguleika á lagningu jarðkapla. Ég tel að þróunin sé komin það langt núna, eins og fram kom í ræðu hæstv. ráðherra, að við eigum alvarlega að athuga að marka okkur þá stefnu nú þegar að fara í lagningu jarðkapla í nágrenni og við þéttbýlisstaði. Í mörgum tilfellum er miklu lægri spenna á þeim strengjum.
Eins og fram kom hjá hæstv. ráðherra er um sambærilegan kostnað um að ræða og víða fer það mjög í taugarnar á fólki þegar slíkar háspennulínur eru lagðar í gegnum t.d. útivistarsvæði. Ég held að í stöðunni eins og hún er í dag þá ættum við að hefjast handa í nágrenni við þéttbýlið í stórum og smáum bæjum.