Fyrirspyrjandi (Árni R. Árnason):
Herra forseti. Á undanförnum vikum og mánuðum hefur þingmönnum sem m.a. nú nýlega hafa verið í kjördæmum orðið ljóst að fjölgað hefur á biðlistum eftir heilbrigðisþjónustu. Síðast í gær var dreift hér á hinu háa Alþingi skriflegu svari hæstv. heilbrrh. við fyrirspurn tveggja hv. þm. um þessi efni þar sem kemur fram að biðlistar í hinum ýmsu greinum hafa lengst verulega. Fleiri einstaklingar bíða aðgerða eða úrlausnar og biðtími virðist lengjast, a.m.k. í þó nokkrum greinum þar sem verulegur hluti af heilbrigðisþjónustunni er unninn af einkaaðilum eða aðilum sem starfa hjá einkareknum fyrirtækjum sem þjónustan er keypt af.
Þá lýsti forveri hæstv. ráðherra í umræðum hér á þingi fyrir nokkrum mánuðum því yfir að hann teldi að heilbrigðisfólk ætti að vinna á opinberum stofnunum. Við hljótum hins vegar að velta fyrir okkur öllum leiðum til þess að vinna á þessum biðlistum. En vegna orða fyrrv. hæstv. ráðherra vil ég óska þess að hæstv. heilbrrh. svari fyrirspurn sem legið hefur frammi á þskj. 246 og er svohljóðandi:
,,1. Sýna vísindalegar niðurstöður fram á að einkarekin sjúkrahús eða læknastofur veiti almennt lakari þjónustu eða skili almennt lakari verkum en sjúkrahús eða heilsugæslustöðvar opinberra aðila?
2. Sýna fjárhagslegar niðurstöður fram á að heildarkostnaður við tiltekin verkefni heilbrigðisþjónustu sé almennt hærri í einkareknum sjúkrahúsum en opinberum þegar tekið hefur verið tillit til langtímakostnaðar við fjármögnun fasteigna, búnaðar og tækjakosts sem til þarf?``