Jón Bjarnason:
Herra forseti. Ég vil ítreka hve alvarleg staðan er á Raufarhöfn og hvað er að gerast þar þessa dagana. Um þessar mundir er, eins og ég gat um áðan, Landsbankinn að segja upp fjórum stafsmönnum á svæðinu og það á að taka gildi nú um næstu helgi. Þá verður þjónusta bankanna, bæði á Kópaskeri og Raufarhöfn, skert þannig að þar verður aðeins opið tvo dagparta í viku.
Ég leyfi mér því, herra forseti, og spyrja: Hafa þessar aðgerðir einar sér, sem eru gríðarlega miklar aðgerðir í svo litlu byggðarlagi, t.d. verið kynntar í umræðunni í ríkisstjórn eða í umræðum við hæstv. byggðamálaráðherra, sem reyndar er ekki hér til staðar? En bara þetta tiltekna mál, þær breytingar sem fyrirhugaðar eru þessa dagana, hafa gríðarleg áhrif og ekki einungis á þjónustuna heldur líka sálræn áhrif. Hefur það verið kynnt í ríkisstjórn?