[prenta uppsett í dálka] 29. fundur, 127. lþ.
Ásta Möller:
Herra forseti. Ég vil byrja á að þakka fyrir þessa fyrirspurn sem hv. þm. Árni Ragnar Árnason hefur varpað fram og þau góðu svör sem hæstv. ráðherra hefur gefið honum.
Það kemur í ljós að milli 20 og 25% af fjárveitingum til heilbrigðismála fara til einkaaðila þannig að einkarekstur í heilbrigðisþjónustu er í raun og veru töluverður hér á landi, allt upp í 94% í endurhæfingargeiranum.
Ástæðan fyrir því að ég kem hér upp til að draga athyglina að þessu er að af þeirri umræðu sem hefur verið í þinginu um einkarekstur í heilbrigðisþjónustu mætti ráða að hann sé af hinu vonda. En ég tel að það sé öðru nær. Í þeim upplýsingum sem við fáum hér frá ráðherranum nefnir hann hinar mestu fyrirmyndarstofnanir sem fólki eru að góðu kunnar, sem fólki er kunnugt að veita verulega góða þjónustu, þar á meðal Reykjalund, Heilsugæsluna í Lágmúla, öldrunarstofnanir og áfram má telja.
