Katrín Fjeldsted:
Herra forseti. Ég þakka hv. þm. Soffíu Gísladóttur kærlega fyrir að vekja athygli á þessu máli með fyrirspurn sinni. Vitað er að átraskanir af ýmsu tagi eru meira í umræðunni, þ.e. anorexía og búlimía, en offituvandamálið fer vaxandi hér á landi eins og kom fram í máli fyrirspyrjandans.
Það sem ég vildi vekja athygli á er að hjá mörgu feitu fólki geta legið að baki ýmis alvarleg vandamál sem mikilvægt er að taka á. Ég tel að mikilvægt sé að ná þeim þverfaglega saman sem hafa sérþekkingu á átröskunum þannig að bjóða megi upp á sérhæfða meðferð handa átröskunarsjúklingum á öllum aldri. Eins og ég boðaði hér í vor er ég að vinna þáltill. um að slíkri þjónustu verði komið á.