[prenta uppsett í dálka] 31. fundur, 127. lþ.
Ísólfur Gylfi Pálmason (andsvar):
Herra forseti. Það á ekki einungis við um Samfylkinguna að vilja fylgja þessum ákvæðum Kyoto-bókunarinnar, langt í frá. Það á við um fleiri þingflokka en Samfylkinguna.
Ég kom inn á það í stuttu andsvari mínu hvort um stefnubreytingu hafi verið að ræða vegna þess að eins og ég benti réttilega á fjallaði fyrsta mál sem Samfylkingin lagði fram á þingi um það að undirrita Kyoto-bókunina þegar í stað. (Gripið fram í.) Það var árið 1999, það er hárrétt hjá hv. þm.
Þess vegna spyr ég hv. þm. hvort um straumhvörf og stefnubreytingu hafi verið að ræða vegna þess að ég hjó eftir því að á ágætum landsfundi þessara samtaka var einmitt talað um að nýta sér verðgildi losunarkvótanna. Ef við hefðum skrifað strax undir Kyoto-samkomulagið, hefði það verið möguleiki?
