Jóhann Ársælsson (andsvar):
Hæstv. forseti. Mér þykir vera tíðindi hér, ef ég hef skilið þetta rétt, að þetta verði bónus fyrir þá aðila, þeir muni fá þetta í bónus ofan á allt saman og að þeir þurfi ekki að kosta því til sem aðrir gera. Ég bið hæstv. ráðherra að leiðrétta mig ef ég hef skilið svarið eitthvað öðruvísi en á að gera. Ég tel að þetta hafi verið tíðindi dagsins ef það er svo að menn hafi gert ráð fyrir því að ef ákvæðið næðist í gegn, þá lægi það fyrir að í kaupunum fylgdi þetta með til þeirra fyrirtækja sem nú hefur verið rætt við um að koma í stóriðju á Íslandi. Það er enginn smábónus, takk fyrir.