[prenta uppsett í dálka] 36. fundur, 127. lþ.
Frsm. 2. minni hluta fjárln. (Jón Bjarnason) (andsvar):
Herra forseti. Já, sælir eru þeir sem ekki sáu. Hefði nú verið betra að ríkisstjórnin með hæstv. forsrh. og formann fjárln. hefði getað tekið með sama hætti á málum og Egill Skalla-Grímsson og a.m.k. ekki selt silfrið á þennan hátt, en hvort hún hefur gengið upp í fjöll og sökkt því í dý, ekki ég veit hvort fjallgöngumaðurinn hv. þm. Ólafur Örn Haraldsson hefði viljað standa í því.
En málið er, herra forseti, að ógætileg meðferð og ógætilegar aðgerðir í ríkisfjármálum og einkavæðingarmálum voru alvarlegar á þeim tíma og það er óumdeilt og það er miður. Af því á að draga lærdóm.
Hitt höfum við rætt ítarlega, herra forseti, vinnubrögðin eða hvað gerðist í fjárln. Ég vil þó vekja athygli á því aftur, ef hv. formaður fjárln. man það ekki, að málið var afgreitt úr hv. fjárln. á sunnudagskvöld. En á aukafundi í fjárln. í gær var rætt um að formaður fjárln. og varaformaður hefðu tekið þátt í hugmyndahópi á vegum ráðuneytanna um niðurskurðartillögur, en það var það fyrsta sem kom fram um framgöngu þeirra í þeim málum.
