Össur Skarphéðinsson (andsvar):
Herra forseti. Hef ég daufheyrst með aldrinum eða heyrði ég ekki þessa röksemd í ræðum hv. þm. áðan? Ég heyrði hann ekki skjóta þessari stoð undir málflutning sinn.
Það skiptir heldur ekki máli. Það hefur alltaf verið ein grundvallarregla sem Íslendingar hafa fylgt í samningum við Evrópusambandið og önnur ríki: Aldrei að fallast á að skipta á aflaheimildum og tollfríðindum. Það er ein meginreglan og það þarf ekki Sjálfstæðisflokkinn til að undirstrika það. Mér kemur aldrei til hugar að hæstv. utanrrh. mundi nokkru sinni fallast á samninga sem gerðu það að verkum að verið væri að selja aflaheimildir, aðgang að lögsögunni, fyrir tollfríðindi. Það hefur aldrei gerst.