Ögmundur Jónasson (andsvar):
Herra forseti. Ég er heils hugar sammála Alþýðusambandinu um það að Evrópumálin eigi að vera á dagskrá. Ég held að allt samfélagið sé á því máli að við eigum að ræða tengsl okkar við Evrópu sem önnur ríki í heiminum.
Niðurstaðan hefur hins vegar orðið sú í flestum verkalýðssamböndum að hér sé um að ræða þverpólitískt mál sem ekki er á færi einstakra verkalýðsfélaga eða samtaka að taka afstöðu til. Menn eru einfaldlega með mjög mismunandi skoðanir á því hvort æskilegt sé að Íslendingar sæki um aðild að Evrópusambandinu.
Innan Alþýðusambandsins eru mjög margir á því máli að það sé heppilegt. Aðrir eru því andvígir. Hið sama gildir innan BSRB, BHM, bankamanna, annarra samtaka. Það er á vettvangi stjórnmálanna hins vegar sem krafa er gerð um það að menn hafi skýrar línur í þessum efnum til að bjóða kjósendum upp á skýra valkosti þegar kemur til kosninga.