Frsm. meiri hluta fjárln. (Ólafur Örn Haraldsson) (andsvar):
Virðulegi forseti. Ég vitna aftur til þeirrar samþykktar sem forsn. gerði og ég gerði að umræðuefni í upphafi míns máls í dag, þar sem segir, með leyfi forseta:
,,Þingnefnd getur ákveðið, að ósk sendanda erindis eða að eigin frumkvæði, að farið skuli með erindi að öllu leyti eða að hluta sem trúnaðarmál.``
Það hafa menn komið sér saman um að verði málsmeðferðin (Gripið fram í.) á þessi ... (Gripið fram í.) Ég ítreka að þetta var samþykkt sem var gerð í fjárln. núna í dag að viðstöddum meiri hluta í nefndinni og í meiri hluta þess fundar voru stjórnarandstöðumenn og það var ekki stjórnarmeirihlutinn sem ákvað þetta heldur var þetta á löglegum fundi nefndarinnar. Ég tel að við séum á allan hátt að fara að reglum þingsins og ég held að menn ættu að fagna því hér að nefndin hefur skotið skildi fyrir þingmenn í nefndinni og reynt að leiða mál til lykta með farsælum hætti.